Koza pojela 20.000 eura?

Porodica Simić iz sela Ranilović, u susjednoj Srbiji, planirala je da kupi 10 hektara zemlje, ali im je planove pomrsila koza koju imaju već nekoliko godina - Belka je pojela 20.000 eura! Iako su planirali da prošire imanje, od tog jutra ništa nije išlo kako treba.

"Ustali smo rano, prebrojali novac jer je trebalo da dođe čovjek od kojeg kupujemo, kako bi potpisali ugovor i čovjeka isplatili. Pare su stajale na stolu u dnevnoj sobi, a mi smo otišli da doručkujemo. Moj tast je izašao kao i svako jutro napolje da nahrani stoku, ali nije primjetio da nije zatvorio ulazna vrata i tu je nastala naša nesreća", ispričala je za Aranđelovacinfo snaja Milena.

Koza je ušla kroz otvorena vrata u dnevnu sobu i počela da jede novac sa stola.

"Kada smo čuli šuškanje i buku, moj muž je ustao od stola i šokirao se. Belka je pojela pare sa stola, ostalo je oko 300 eura samo, a sve ostalo je bilo pocijepano i pojedeno. Od tog dana ništa ne govori, samo sjedi i šuti i gleda u jednu tačku. Belka nas je zavila u crno", dodaje Milena.

Ako se pitate šta se desilo sa kozom - završila je na ražnju.